د ایټالیا د نماینده ګانو د مجلس رئیس: د افغانستان او ایټالیا تر منځ د ستراتیژیکو اړیکو د سند لاسلیک کول د دواړو هېوادونو په ګټه دي

د خپرېدو نېټه: Jan 26, 2012

د ۱۳۹۰ کال د سلواغې ۶مه - د افغانستان د اسلامي جمهوریت جمهور رئیس حامد کرزي نن له غرمې مخکې د ایټالیا د نماینده ګانو د مجلس له رئیس ښاغلي ګاین فرانکو فیني سره د ایټالیا په پارلمان کې وکتل.

د نماینده ګانو د مجلس رئیس د هېواد جهمور رئیس او ملګري پلاوي ته هر کلی ووایه او خوښي یې څرګنده کړه چې ایټالیا او افغانستان د ستراتیژیکو اړیکو سند لاسلیک کوي.

ده زیاته کړه چې ددغه ستراتیژیک سند له مخې به ایټالیا وتوانیږي تر څو له ۲۰۱۴ کال وروسته د خپل دوست هېواد افغانستان سره خپل رول او مرستو ته ادامه ورکړي.

ښاغلي فیني وویل: د ایټالیا د نماینده ګانو مجلس باور لري چې له افغانستان سره د ایټالیا د ستراتیژیکو اړیکو د سند لاسلیک کول د دواړو دوستو هېوادونو په ګټه دي.

همدا راز د ایټالیا د نماینده ګانو د مجلس رئیس وویل چې افغانستان ته یې په خپل وروستي سفر کې ولیدل چې په دې هېواد کې ډېر مثبت بدلونونه راغلي دي. ده ټینګار وکړ چې د ایټالیا او افغانستان د پارلمانونو تر منځ اړیکې او همکارۍ زیاتې  او پراخه شي.

د هېواد جمهور رئیس د ایټالیا او افغانستان تر منځ اړیکې ژورې او دوستانه وبللې، زیاته یې کړه چې همدا لامل ؤ تر څو دوو افغان پاچاهانو په روم کې استوګنه غوره کړه.

دغه راز حامد کرزي دافغانستان د خلکو او  پارلمان په استازیتوب د افغانستان په عدلي او قضایي سیستم او دغه راز  د هرات د هوايي ډګر د پروژې د پراختیا او په دغه ولایت کې د زیربنایي جوړښتونو په برخه کې د ایټالیا له مرستو څخه مننه وکړه.

همدا راز د هېواد جمهور رئیس وویل چې د بُن په دوهم کنفرانس کې د ایټالیا ګډون او له کنفرانس څخه ددغه هېواد ملاتړ افغانانو ته دا ثابته کړه چې ایټالیا به له ۲۰۱۴ کال وروسته هم خپلو مرستو ته ادامه ورکوي.

جمهور رئیس په دې کتنه کې د افغانستان د روانو حالاتو، د سولې  او د مسؤولیتونو د لېږد د بهیر په اړه معلومات ورکړل ویې ویل چې افغانستان آماده دی چې تر ۲۰۱۴ کال پورې ټول مسؤولیتونه له نړیوالو ځواکونو افغان ځواکونو ته ولېږدول شي.