دیدار حامدکرزی با وزیر ترانسپورت تاجیکستان-21 ثور 1387

حامدکرزی رئیس جمهوری اسلامی افغانستان عصر امروز با عبدالرحیم عاشور وزیر ترانسپورت و مخابرات تاجیکستان و هیات همراه وی در ارگ ریاست جمهوری ملاقات و گفتگو کرد.

دراین ملاقات عبدالرحیم عاشور وزیر ترانسپورت و مخابرات تاجیکستان پیام امام علی رحمان رئیس جمهوری آن کشور را به حامد کرزی رئیس جمهوری اسلامی افغانستان ارایه نمود.

دراین پیام آمده است که کشور تاجیکستان در زمینه احداث خط آهن میان دو کشور، تسهلات لازم جهت انتقال برق از قرغزستان به تاجیکستان و از آن جا به افغانستان وپاکستان و ایجاد سهولتها در راه های زمینی افغانستان که کشور تاجیکستان را به کشور ایران وصل می نماید، خواهان همکاری و توجه افغانستان است که رئیس جمهور کشور از این پیشنهادات استقبال نمود و وعده هر گونه همکاری را به جانب جمهوری تاجیکستان سپرد.

دراین ملاقات وزیر ترانسپورت تاجیکستان از رئیس جمهوری اسلامی افغانستان دعوت نمود تا در کنفرانس شانگهای که قرار است در اواخر ماه اگست در جمهوری تاجیکستان برگزار گردد، و سپس در کنفرانس حاشیه وی که به اشتراک روسای جمهور افغانستان، ایران و تاجیکستان دایر می گردد، اشتراک نماید.

در این ملاقات همچنان در رابطه به انتقال انرژی برق به اندازه سه صد میگاوات از جمهوری تاجیکستان به افغانستان و همچنان گسترش و تعمیق همکاری ها میان دو کشور نیز بحث و تبادل نظر شد.

قابل ذکر است که، وزاری خارجه سه کشور ملاقات های مقدماتی به خاطر برگزاری این کنفرانس انجام می دهند.

گفتنی است که وزیر ترانسپورت تاجیکستان در راس یک هیات از روز جمعه به خاطر اشتراک در دومین اجلاس کمیسیون مشترک همکاری میان افغانستان- تاجیکستان در کابل به سر می برد.

دراین ملاقات جلیل شمس وزیر اقتصاد، حبیب الله قادری وزیر ترانسپورت، زلمی رسول وزیر مشاور امنیت ملی و محمد عمر داودزی رئیس دفتر مقام ریاست جمهوری حضور داشتند.